MUTANE 3 SUN MUTU, GIDAJE 3000 SUN RUSHE A AMBALIYAR RUWA A JIHAR YOBE

Kimanin mutane 3 ne suka hallaka, gidaje 3000 kuma suka rushe a sakamakon ambaliyar ruwa da ta faru a sanadiyyar ruwan sama kamar da bakin Kwarya a kananan hukumomi 10 a jihar Yobe.

Sakataren hukumar ba da agajin gaggawa ta jihar SEMA Dr. Muhammad Goje shi ya tabbatar da hakan ga manema labarai a yayin da yake rabon tallafi ga wadanda bala'in ambaliyar ya shafa a kauyen Godowoli na karamar hukumar Fika a ranar Alhamis.

Sakataren hukumar ya kuma ce jihar Yobe ta hannun SEMA za ta taimaka wa duk wadanda bala'in ya shafa domin rage musu radadi.

Kananan hukumomin da abin ya shafa sun kunshi karamar hukumar Damaturu, da Fika, da Fune da karamar hukumar Bursari.

Sauran kananan hukumomin sun hada da karamar hukumar Machina, da Yusufari, da Gaidam, da Potiskum, da Bade da kuma karamar hukumar Nguru.

Jaridar Daily Post ta rawaito cewa kayayyakin da aka  raba wa wadanda abin ya shafa a kauyukan Kalallawa da Godowoli  sun hada da banduran kwanukan rufi da kososhi da buhunan shinkafa, da taburmi da dai sauransu.

Shugaban hukumar SEMA ya gargadi wadanda suka sami tallafin da su guji sayar da kayayyakin, kana ya bukace su da su yi amfani da su ta hanyoyin da suka dace.

KOTUN SAURAREN KARARRAKIN ZABE A JIHAR KANO TA YI BARAZANAR MAYAR DA ZAMANTA ZUWA ABUJA

Kotun sauraren kararrakin zabe dake zamanta a jihar Kano ta yi barazanar sauya matsugunninta zuwa Abuja muddun aka yi wa wani mambanta barazana a jihar.

Alkaliyar Kotun mai shari'a Halima Shamaki Muhammad ita ce ta fadi hakan a yayin da take Allah wadai da wani farmaki ta internet da aka kai wa daya daga cikin shaidun hukumar zabe wacce ta bayar da shaida a gaban kotun

Mai shari'a Halima ta ce tana daya daga cikin wadanda suka nace akan cewa Kotun sai ta gudanar da zamanta a jihar Kano domin ta ba wa mutanen jihar damar gani da jin abubuwan dake wakana a kotun.

Jaridar Daily Trust ta rawaito cewa matakin na kotun ya biyo bayan korafin Lauyan hukumar Zabe Adedayo Adedeji wanda ya sanar da kotun cewa an kai wa daya daga cikin shaidun hukumar Halima Sambo Hasan farmaki ta kafafen sada zumunta.

Halima Sambo Hasan dai ita ce Jami'ar hukumar ta karamar hukumar Ungoggo an dauki hotonta a bayan ta ba da shaida an kuma watsa hotunan a kafafen sada zumunta na Soshiyal Midiya inda ake alakanta ta da gwamnatin jihar lamarin da ya sa mutane suka farmake da kalaman zagi.

Adedeji ya kuma kwatanta lamarin a matsayin wulakanta kotu, inda ya roki kotun da ta dauki matakin da ya dace.

Shi ma dai Lauyan jam'iyyar PDP Maliki Kuliya Umar ya yi Allah wadai da abin da ya faru inda ya kwatanta shi a matsayin abin da ba za a amince da shi ba, kana ya kira shi da cin mutuncin shari'a.

A hukuncinta mai shari'a Halima ta ba da umarnin hukumomin da suka dace da su  gudanar da bincike akan lamarin.

An kwatanta Wakilcin Hon. Lawan Sani da na Sayyadina Umar (R.A)

Jama'a a garin Nguru jihar Yobe har ma da wasu a wajen Nguru na ci gaba da shi albarka ga dan majalisa mai wakiltar Nguru ta tsakiya a majalisar jiha Hon. Lawan Sani.

Wannan fatan alheri na zuwa ne tun bayan bayyanar wani hoto da  Hon. Lawan Sani ya sanya a shafinsa na Facebook a ranar Alhamis a cikin ruwan sama.

A hoton an gano dan majalisar a gidajen wasu talakawa da ruwa ya mamaye a sakamakon ruwan sama kamar da bakin   Kwarya da aka shafe awoyi ana tafka shi tun da asubahin ranar Alhamis a garin Nguru.

Dan majalisar da aka kwatanta aikinsa da na Sayyadina Umar(R.A) ya rubuta cewa mutanen da bala'in ya shafa za su sami tallafi daga kungiyoyin agajin gaggawa tare da gwamnatin jihar Yobe.

Hon. Lawan ya ce: "A yau da karfe shida na safe 6:00am na fita dan naga irin damuwar da al'ummar mu suka shiga ah sa nadiyar ruwan sama kuma Inshaa Allah Gomnatin Yobe zata kawo mana gudun mawa"( and other agencies for intervention). Allah Ya taimaki Al'ummar mu!!!".

Tun daga bayyanar sakon ne jama'a ta ci gaba da martani inda wasu suka ce abin da dan majalisar ya yi aiki ne irin na magabatan farko.

Wasu rahotanni sun tabbatar da cewa dan majalisar dake wakiltar Nguru a karo na farko bayan ya kada na jam'iyyar APC mai ya shiga an kwashe ruwan da ya mamaye wadannan gidaje ba tare da ya sanar da kowa ba.

Ruwan saman na ranar Alhamis ya janyo asara mai yawa da rushewar gidaje al'amarin da ya raba mutane da dama da mahallansu.

Kazalika wasu rahotanni a yau Juma'a sun tabbatar da cewa Hukumar agajin gaggawa ta SEMA ta iso garin Nguru domin kididdige adadin wadanda bala'in ambaliyar ruwan ya shafa.

Ishaq Rabi'u Ishaq daya ne daga cikin mazauna Nguru ya ce abin da dan majalisar ya aikata aiki ne irin na Sayyadina Umar a lokacin yana Khalifan Muslumci.

Idan ba a manta ba, ko a 'yan satikan da sukan da suka wuce an gano dan majalisar a cikin magudanan ruwa yana yashe su tare da jama'arsa, kafin daga bisani a gano shi a makabarta yana feshin ciyawa tare da gyara wasu kaburburan da suka rufta.

An kammala yanka da rabon naman Saniyar Mr. Las ta Unguwar Bulabulin.

A kokarinsa na ganin ya samar wa matasa da al'umomin unguwannin cikin gari guda hudu da dan abin kai wa bakin salati na naman Sallah, Hon. Lawan Sani dan majalisa mai wakiltar Nguru ta tsakiya ya yanka katuwar Saniyar da ya gabatar wa al'umar unguwar Bulabulin.

Saniyar wacce Alaramma Gwani Sulaiman ya yanka a yau Lahadi an yanka ta ne da misalin karfe 10: 52 na safe bayan an sauko daga Sallar Idi.

An yanka Saniyar ce a gaban gwamman jama'a da taimakon wakilan yankan
karkashin kulawar Malam Rabi'u Maikaratu.

Wakilin wannan Dandali ya sami halarta wurin yankan ya kuma ba da labarin cewa an rararraba naman Saniyar ga mabukata, inda galibin wadanda suka halarci wurin yankan sun sami naman.

Duk kuwa da cewa harkar jama' ba zai yiwu a kasa samun wasu 'yan korafe-korafe ba, to amma sai dai inji wakilinmu  za a iya cewa aikin ya sami nasara.

Wasu da suka samu naman sun nuna jin dadinsu game da wannan gagarumar Layya da Hon. din ya yi musu.

Suna masu cewa sun gamsu da wakilcin dan majalisa Lawan Sani.

Taron yankan wanda aka bayyana a matsayin na farko a tarihi ya sami halarta gwamnan magoya baya daga sassa daban-daban na unguwar da suka hada da Malam Rabi'u Maikaratu, da Sabo Pillars, da Malam Umar Haruna Famasi na hukumar kula da jidagen Yari ta kasa( Nigeria Prison Service),da wani wanda ake kira Teteyi.

Akwai kuma Danjuma mai aski, da Sagiru kira, da Allai Madu Guba tare kuma da Hon. Abubakar Man B.K mai neman takarar Kansilan Unguwar Bulabulin.

Sauran mahalarta wurin yankan sun hada da Alhaji Garba da Abdullahi Dan mai kosai da aka fi sani da Kawu Lele, da Bala An gaishe shi da Erg. Mado da Dan Asabe Fanis, da Isibu Journalist da dai sauransu.

KO A JIKINA ZARGIN RASHIN CANCANTARMU NEMAN TAKARA, KUMA SAI MUN BA WA MARADA KUNYA— Hon. Fatima Musa Walida

Daya daga cikin masu son jam'iyyar PDP  ta ba su tikitin takarar Kansila a Nguru Hon. Fatima Musa Walida, ta ce ko a jikinta zargin rashin cancanta neman takara da wata mambar jam'iyyar ta yi musu.

Hon. Walida ta kuma yi alkawarin sai ta ba wa marada kunya idan ta zama Kansila a zaben kananan hukumomi da na kansilolin jiha mai zuwa.

Tana mai tabbatar da cewa a neman takarar ta babu gudu babu ja da baya.

Walida wacce ke naman takarar Kansilar unguwar Bulabulin ta bayyana hakan ne a yammacin ranar Litinin a yayin da take mayar da martani kan zargin rashin cancantar tsaya wa takara da wata mambar jam'iyyar ta yi musu a ranar Lahadi.

Hon. Walida ta fada wa wannan Dandali cewa ita ko a jikinta don an sami wata a ra'ayinta ta ce ba su cancanci takara ba domin tana da damar ta fadi hakan.

Ta ce  Tsarin mulkin kasa ya ba ta dama kuma mutanen da suke burin tozarta wasu to shirya su ne za su tozarta.

Ta ci gaba da cewa kalaman matar ba za su sanyayar mata da gwuiwa ba, hasali ma kwarin guiwa suka ba ta domi dama a wajen Allah take nema.

Daga nan sai ta jaddada wa magoya bayanta cewa alkawaran da ta dauka idan ta zama Kansila za ta cika su  ta yadda har 'yan adawa ma za su sha mamaki.

Hon. Walida ta yi wani abu mai kama da jirwaye mai kamar wanka ga 'yan adawa,  ind ta ce ai idan ana Sallah to fa ba a magana, zai yi wuya dan Adam yayi komai daidai.

Walida wacce ke magana cikin raha da wannan Dandali ta wayar salula ta ce, ta yi amannar cewa dan Adam tara yake bai cika goma ba, wanda hakan ke nuna cewa babu wani  dan Adam zai ce dari bisa dari yana aikata daidai ko da kuwa kuskuren nasa bai fito fili ba.

Ta ce tabbata ko ita ma matar da yi wannan kwatance ba ta isa ta ce tana aikata komai daidai ba, ballantana kuma har ta yi tunanin ta fi kowa.

Ta kara da cewa a baya an sha ba su labarin cewa an sami mutanen kirkin da Allah ya jarabe su da watsewa, wasunsu kuma mutanen banza ne sai Allah ya jarabce su da shiryuwa.

Ta ce mutum dai ya iya bakinsa ba dan waninsa ba ko dan kansa da iyalansa, domin rayuwar yau ba tabbas ne da ita ba.

KU KIYAYI TSAYAR DA 'YAN BARIKI TAKARA— 'Yar PDP ta fada wa Jam'iyyar a garin Nguru

Wata mata 'yar jam'iyyar PDP a Nguru ta yi kira ga shugabannin jam'iyyar da su kiyaye wajen ba wa wadanda ta kira da 'yan bariki tikitin takara domin samun nasarar jam'iyyar a zabukan shugabannin kananan hukumomi da na kansilolin jiha mai zuwa.

Matar wacce ta bukaci a boye sunanta ta fada a zantawarta da wannan Dandali ta wayar salula a ranar Lahadi cewa idan za a tsayar da 'yan takara to ya kamata a tsayar da nagartattun 'yan takara da za su iya cin zabe ba wadanda ta kwatanta da ballagazazzu ba.

Ta ce ta yi takaicin ganin wasu hotunan mata a shafukan sada zumunta ana tallatawa wadanda ta ce a ra'ayinta su ma ba su cancanci a nuna su a matsayin 'yan takara ba.

Da wakilin wannan Dandali ya tambaye ta to ko su ma matan da ta ga ana tallatawa 'yan bariki ne? Sai ta ce a a ba ta fada ba, amma dai a dukkanninsu babu wacce ta cancanci a tsayar takara.

Wakilin Dandalin ya sake tambayar ta ko wadanne mata ne suka cancanci a tsayar? Sai ta ce idan ma dole sai an tsayar da mata to a tsayar da matan aure masu daraja wadanda suka san kimar iyali da tarbiyya da za su iya kawo dukkan ci gaban da ake nema.

Matar wacce ta kira kanta mai kishin jam'iyya ta yi barazanar cewa babban kuskuren da PDP zata tafka a Nguru shi ne ta ba wa 'yan bariki takara.

Tana mai cewa ko ita a matsayinta na mambar jam'iyyar ba za ta zabi ballagazi ko ballagaza ba idan suka fito takara.

Ta ce ya kamata shugabannin jam'iyya su dubi wani abu na daban su saka wa wasu mutanen kan wahalhalun da suka sha a lokutan yakin neman zabe, amma ba jagorantar 'yan kasa ba.

To sai dai a nata bangaren, jam'iyyar PDP ta fada ta bakin Shugaban jam'iyyar na unguwar Bulabulin Rabi'u Maikaratu cewa jam'iyyar har yanzu ba ta tsayar da dan takara a mukaman da aka gano mata suke sha'awar nema ba.

Maikaratu wanda ke magana a yayin gangamin kaddamar da neman takarar Hon. Fatima Musa Walida ta Kansilan unguwar Bulabulin a ranar Asabar ya ce,  a matsayinsu na iyayen jam'iyya dole ne a kansu da su dauki kowane dan jam'iyya daidai.

Idan ba a manta ba a 'yan kwanakin nan wasu hotunan mata na ta yawo a kafafen sada zumunta wadanda ake alakanta su da neman takarar Kansila wasu Unguwanni a Nguru, al'amarin da janyo martane- martane mabambanta daga wasu mazauna garin da dama.

An kaddamar da neman takarar Hon. Fatima Musa Walida ta Kansilan Unguwar Bulabulin a jam'iyyar PDP

Mai neman takarar Kansilan Unguwar Bulabulin a karamar hukumar Nguru a karkashin jam'iyyar PDP Hon. Fatima Musa Walida ta kaddamar da neman takararta ta neman Kansilan Unguwar.

An kaddamar da neman takarar ce a Asabar din nan a Cibiyar kallo ta Bulabulin( Bulabulin View center) cikin wani gagarumin biki da daruwan 'yan jam'iyyar suka halarta.

Wakilin wannan Dandali ya sami halartar taron ya kuma ba da labarin cewa taron ya sami hadin kan mambobin jam'iyyar.

An gabatar da jawabai daban-daban a wurin taron da galibin mahalartansa suka tashi cikin murna.

A jawabinsa na maraba, Shugaban jam'iyyar PDP na Bulabulin Rabi'u Maikaratu ya gode wa mahalarta taron tare da yin fatan a watse taro lafiya.

Rabi'u Maikaratu ya kuma ce jam'iyyar PDP na marhabin da duk wani danta da ya nuna sha'awar tsayawa takara, domin a matsayin su na iyayen jam'iyya dole ne su bi da kowa daidai.

Rabi'u Maikaratu ya ce  izuwa yanzu jam'iyyar PDP ba tsayar da dan takarar Kansila ba, to amma sai dai kowanne dan jam'iyya na hakki ya nema sannan kuma ya kaddamar da nemansa kamar yadda Walida ta kaddamar.

A nasa bangaren uban taron wanda kuma shi ne dan takarar shugancin karamar hukumar a karkashin jam'iyyar PDP Hon. Sani Garba Sharu ko Sani Gida-Gida ya yaba da yadda aka gudanar da taron.

Ita kuwa a nata jawabin da ta yi wa 'ya'yan jam'iyyar, mai neman takarar Kansilan ta Bulabulin Hon. Fatima Musa Walida gode wa Allah (SWT) ta yi tare da nuna jin dadinta game da yadda aka gudanar da taron.

Hon. Walida a jawabin ta kuma bayyana kudurorinta, wadanda ta ce idan aka zabe ta Kansila zata aiwatar wa mutanen unguwar.

Kudurorin nata dai sun hada da:

1. Kirkiro wasu hanyoyin hikima na dadada wa marayun da suke shan wahala a unguwar tare da tallafa musu da littafai da kayan makaranta domin su ma su sami rayuwa nagartacciya.

2. Za ta yi duk mai yiwuwa wajen ganin a ciccike ramukan da suke unguwar ta yadda za a hana ruwa kwanciya nan gaba.

3. Za ta gyara Famfunan da suka lalace wadanda aka yi watsi da su sannan kuma ta yi kokarin gina karin wasu sabbi a fadin unguwar.

4. Akwai kuma wani shiri na musanman da zata kirkiro na ciyar da unguwar gaba.

Hon. Walida daga karshe ta gode wa mahalarta taron tare da yin addu'o'in samun nasara a zaben kananan hukumomi da na kansiloli mai zuwa.

An kaddamar da neman takarar Hon. Sani Garba Sharu ta shugancin karamar hukumar Nguru a PDP a ranar Litinin

Daruruwan 'yan jam'iyyar PDP ne maza da mata a ranar Litinin suka taru a babban dakin taro na kamfanin Lasanco dake Nguru domin halartar babban taron kaddamar da neman takarar Hon. Sani Sharu ta shugancin karamar hukumar Nguru a karkashin jam'iyyar.

Wakilin wannan Dandali ya sami halartar babban taron ya kuma ba da labarin cewa 'yan jam'iyyar PDP sun goyi bayan mai neman takarar.

An kuma gabatar da jawabai daban-daban a wurin taron yayin da da dama daga mahalarta taron suka tashi cikin murna.

A jawabinsa ga 'yan jam'iyyar a wurin taron, mai neman takarar shugancin karamar hukumar Nguru Hon. Sani Sharu ya bayyana kudurorinsa da ya ce idan aka zabe shi zai samar wa mutanen Nguru.

Hon. Sani kamar yadda wani na hannun damarsa Habu Salisu ya jaddadawa wannan Dandali, ya yi alkawarin cewa zai samar da ci gaban da suka hada da:

1. Kirkiro wani tsari da zai taimaka wajen inganta ilimin karamar hukumar.

2. Sannan ya samar wa matasan karamar hukumar hanyoyi na musanman wajen dogaro da kai.

3. Zai yi duk mai yiwuwa wajen hada kan matasa ta hanyar wasu daburu na musanman domin ci gaban Nguru.

4. Zai inganta fannin lafiya da suka kunshi haihuwa kyauta a daukacin karamar hukumar.

5. Akwai kuma shiri na musanman na raya karkara domin jin dadin 'yan karamar hukumar.

Hon. Sani a jawabin ya kuma godewa mahalarta taron da daukacin 'yan karamar hukumar Nguru, yana mai addu'ar samun nasara a zaben kananan hukumomi mai zuwa.

Ana ci gaba da aikin Hon. Lawan Sani na feshin maganin sauro gida-gida a garin Nguru.

Tun a ranar Larabar 3 ga watan Yulin nan ne Hon. Lawan Sani Inuwa dan majalisa mai wakiltar Nguru ta tsakiya a majalisar jiha ya kaddamar da Shirin YAKI DA ZAZZABIN CIZON SAURO da aka fara da feshin magunguna a gidajen daukacin Unguwannin cikin gari guda hudu(4).

An kaddamar da Shirin ne kwanaki biyu kacal da aka gano dan majalisar da jama'arsa suna yashe wasu magudanan ruwa.

Jama'a na ci gaba da nuna jin dadi da farin ciki kan aikin feshin wanda a yau Asabar aikin ya shiga kwanaki na 5.

Wakilin Wannan Dandali ya yi kicibis da wasu ma'aikatan feshin a yau Asabar a Bulabulin ya kuma tambaye su ko yaya aikin yake gudana?

Daya daga cikin Ma'aikatan Musa Mal. Mati da aka fi sani da Kafar Yawo ya tabbatar da gamsuwar jama'a kan aikin na feshin Sauro.

Kafar Yawo wanda wakilin Dandalin ya tare shi a daidai lokacin da yake fitowa daga wani gida bayan ya feshe su da maganin a Bulabulin ta 2 ya ce aiki yana gudana kuma al'uma na ci gaba da yi wa Hon. Lawan addu'o'i.

Ya ce tunda suka somo aikin a ranar Laraba ba su fiskanci wata matsala ba, hasali ma sai tarbar arziki da suke samu gida-gida.

Kazalika Wannan Dandali ya sake kicibis da wasu ma'aikatan feshin guda biyu a a yayin da suke aikin na feshin a unguwar ta Bulabulin jim kadan bayan ya zanta da Kafar Yawo a yau Asabar.

Ma'aikatan biyu Rabi'u Muhammad da Lawan Musa su ma sun tabbatar da cewa aikin ya sami karbuwa a wurin jama'ar gari.

Suka ce mutane na tarbar su hannu biyu-biyu inda har wasu kan yi musu alherin ruwan Sanyi.

Shi ma dai shugaban ma'aikatan a unguwar Bulabulin  Sabo Pillars ya tabbatar da aikin na tafiya daidai.

Yana mai cewa tini har sun kammala da yankin Bulabulin ta 1 tun a ranar Jama'a, inda suke sa ran kammalawa da Bulabulin ta 2 da Bulabulin ta 3 daga Asabar din yau zuwa ranar Litinin din 8 ga watan Yulin 2019.

Wani sashen gari Nguru

Pillars ya ce Ma'aikatansu shida-shida aka tura sauran Unguwanni 3 da suka hada da Hausari, Tsohon Nguru da Sabon garin Kanuri a halin yanzu na ci gaba da aikin feshin safe da rana.

MU MUKA SA KANMU AIKIN GAYYA BA WANI NE YA SAKA MU BA

Matasa na kan aikin yashe magudanan ruwa a Bulabulin Nguru

Wasu matasa a Bulabulin Nguru da suka gudanar da aikin yashe magudanan ruwa a yau Lahadi sun musanta cewa wai saka su aka yi domin su yashe magudanan ruwa a wasu sassan unguwar.

Matasan sun karyata bayanan ne biyo bayan abin da suka kwatanta da farfaganda da wasu suke yadawa a kafafen sada zumunta kan cewa wai mahunkuntan gari ne suka umarci da a gudanar da aikin.

A zantawarsu da Wannan Dandali a yau Lahadi jim kadan bayan sun kammala aikin yau da suka somo shi ta magudanan ruwan titin Zakariya Mai malari (Layin Marigayi Haruna Pharmacy ko ko layin Abdulhamidi ko na marigayi Alh. Ari Machina), matasan suka ce za su ci gaba gobe idan Allah ya kai mu ta layin Alh. Kwalle inda suke sa ran danganawa da layin Alh. Adam mai mota.

Shugaban masu gudanar da aikin da ya bukaci a boye sunansa ya ce duk shekara sun saba gudanar da Wannan aiki, kuma rashin adalci ne a ce wasu ne suka saka a a yi aikin a yanzu.

Ya ce bai sani ba ko a wani wuri, amma su dai domin radin kansu suka gudanar da aikin.

Daya daga cikin masu aikin kuma na hannun damar Hon. Lawan Sani, Musa Mati wanda aka fi sani da Musa kafar yawo ya shaida wa Wannan Dandali cewa aikin na ganin damarsu ne bai wai umarni ne na mahunkuntan gari ba.

Ya ce babu azzalimi kamar wanda ya alakanta aikinsu da umarnin mahunkunta.

Tunda farko Hon. Lawan Sani dan majalisa mai wakiltar Nguru ta tsakiya a jiya Asabar ya fitar da wata sanarwa a shafinsa na Facebook inda yake gayyatar magoya bayansa da su fito a gobe Litinin da misalin 6:00 na safe domin sanya tubalin aikin yashe magudanan ruwan da za a somo daga arewacin garin Nguru.

Mun gamsu Mai Mala Buni alheri ne — wasu ma'aikata a jihar Yobe

Gwamna Buni na jihar Yobe

Wasu a ma'aikata a jihar Yobe sun bayyana cewa izuwa yanzu zuciyarsu ta sami nutsuwa da sabon gwamnan jihar Mai Mala Buni.

Ma'aikatan sun bayyana hakan a ranar Alhamis a yayin zantawarsu da wannan Dandali a Nguru.

Suka ce sun yi mamakin yadda gwamna Buni ya biya su albashin watan Juni tun da wurwuri.

Wani ma'aikaci a mataki na jiha ya fada a zantawarssa da wannan Dandali cewa a zatonsa albashi sai baba ta gani, duba da cewa a mafi yawan lokuta idan aka sami canjin jagora akan yi wasu sabbin tsare-tsare kafin komai ya dawo daidai.

" to sai ga shi ba zato ba tsammani da sanyin safiya albashi ya iso tun a ran 25 ga wannan wata" a cewar ma'aikacin.

Shi ma wani ma'aikacin da ya zanta da wannan Dandalin a Nguru gode wa Gwamnan ya yi inda ya kwatanta shi da cewa alheri ne.

Ya kuma ya ba da yadda gwamna ya sassauta dokar takaita zirga-zirga( Curfew) domin 'ya'yan jihar su sake samun sa'ida.

An rantsar da Mai Mala Buni a ranar 29 ga watan Mayun 2019 a bayan Ibrahim Gaidam ya kammala zagonsa na biyu.

SUKAR SHUGABAN KARAMAR HUKUMAR NGURU DA HON. LAWAN SANI YA YI CI GABAN DIMUKRADIYYA NE A GARIN NGURU— Masu fashin bakin siyasa

An kwatanta kalaman Hon. Lawan Sani da ya yi kan shugaban karamar hukumar Hon. Ali Maidami a matsayin girman Dimukradiyyar garin Nguru

Wasu masu fashin bakin siyasa a garin Nguru sun bayyana cewa kalaman Hon Lawan Sani da ya yi akan shugaban karamar hukumar Nguru a ranar Laraba wata babbar alama ce dake nuna girman Dimukradiyyar garin Nguru.

Wani da ya ga siyasar jiya kuma yake ganin ta yau da ya zanta da wannan Dandali a Lahadin nan ya ce abin da dan majalisar ya yi ba abu ne sabo a Dimukradiyya ba.

Masanin siyasar da ya ce a boye sunansa saboda wasu dalilai na kashin kansa ya jadda cewa abu ne mawuyaci wasu su fahimci muhimmancin hakan, musamman ma wadanda suke fushi da fushin wani.

Ya ce  kalaman Lawan Sani abin a yaba ne ba abin yin cecekuce ba.

Ya kara da cewa idan aka dubi jihohin da siyasarsu ta ci gaba, to fa za a samu cewa 'yan siyasar wadannan jihohi na ci gaba da kalubalantar juna.

Ya ce ya yi matukar mamakin yadda ya ga wasu da ya kwatanta da 'yan tashi biya suna ta kunfar baki maimakon su dubi abin duba na tsanaki da hangen nesa musamman kan zarge-zargen da dan majalisar ya yi akan shugaban.

Yana mai buga misali da jihar Kano inda a cewarsa ba ma a mabambanta jam'iyyu ba, ya ce akan sami irin hakan har a tsakanin 'yan jam'iyya guda wani ya soki wani.

Idan ba a manta ba a ranar Larabar da ta gabata ne Hon. Lawan Sani a shafinsa na Facebook ya kalubalanci shugaban kan zargin cewa shugaban na shirin gwanjatar da ruwan kogin Nguru, zargin da shugaban ya musanta.

Wakilin wannan Dandali ya aike wa shugaban karamar hukumar da sako a shafinsa na Facebook don jin ko ina aka kwana game da wannan zargi, to amma sai dai har zuwa lokacin hada wannan rahoton shugaban bai ce da shi komai ba.

Wasu rahotanni sun tabbatar da cewa wasu gungun masunta ne a garin suka nemi taimakon dan majalisar da ya sa baki domin ganin an dakatar da zargin gwanjatar da ruwan kogin Nguru da ake yi wa shugaban kan zargin cewa wai masuntan ba su zabi dan majalisar jiha na Jam'iyyar APC ba Hon. Shuaibu Danladi Hamza da ya kasa kai bantensa a zabukan da suka gabata.

Hon. Lawan Sani dai shi ne dan majalisar jiha daga Nguru tsakiya a jam'iyyar PDP mai adawa yayin da shugaban karamar hukumar Nguru Hon. Ali Maidami kuma dan jam'iyyar APC ne mai mulki.

Wani limami a Nguru da ya shahara wajen yin addu'a ga shugaban kasa Buhari ya daina yin addu'o'in inda ya canja zuwa kan 'yan kasa.

Bayanai sun nuna cewa wasu da suke bibiyar hudubobin malamin sun gano cewa a baya babu yadda za a yi Sheshin Malamin ya tsallake shugaban cikin addu'o'i.

Wasu da suka zanta da Wannan sun tabbatar da cewa sun kasa kunne a yayin da malamin ke gabatar da hudubar Sallar Idin da ya gabata, to amma sai dai ba su ji malamin ya ambato shugaban kasa a addu'o'i kamar yadda ya saba a baya ba.

Daga nan a cewarsu sai suka fara zargin cewa ko malamin ya dawo daga rakiyar shugaban Kasa Muhammadu Buhari.

Wakilin wannan Dandali a yau Juma'a ya ziyarci Masallacin da sheshin Malamin yake limanci domin gudanar da Sallar Juma'a, ya kuma tabbatar da cewa malamin ya tsallake shugaban kasa a addu'o'in da ya saba, wanda a maimakon hakan sai ya karkata kan yin addu'o'i ga talakawan kasa.

Duk kuwa da cewa Malamin ba shi ne ya sanar da daina yi wa shugaban addu'a ba, to amma sai dai an gano hakan ne tun a hudubarsa ta Sallar Idin da ya gabata.

A kan haka ne ma wakilin wannan Dandalin ya yi kokarin jin martanin Sheshin Malamin da ake yi wa take da( Na-Buhari mai 'yan addu'o'i), to amma sai dai wakilin Dandalin bai yi gam da katar ba.

NEXT LEVEL!

An fara nuna wa juna yatsa tsakanin Dan majalisa Hon. Lawan Sani da shugaban karamar hukumar Nguru Hon. Ali Maidami

Wannan na zuwa ne tun bayan bayyanar wani sako da Hon. Lawan Sani Inuwa dan majalisar jiha na kwaryar Nguru mai jiran gado ya rubuta a ranar Laraba a shafinsa na Facebook,  inda yake kalubalantar Hon. Ali Maidami shugaban karamar hukumar Nguru.

Duk kuwa da cewa Hon. Lawan Sani bai fito fili ya bayyana ko kan menene yake sukan shugaban ba, to amma sai dai ya kwatanta shugaban karamar hukumar da mai son tada zaune tsaye.

A sakon kazalika Hon. Lawan Sani ya kuma zargi Shugaban da yunkurin jefa matasa zaman kashe wando, tare da raba kawunan jama'a.

To sai dai a martaninsa da yammacin Larabar nan wanda Lawan Aljan Nguru ya wallafa a shafinsa na Facebook, Shugaban karamar hukumar Nguru Hon. Ali Maidami ya karyata daukacin zargin dan majalisar.

Yana mai cewa zarge-zargen  ba su da tushe ballantana makama.

To sai dai a 'yan kwanakin nan an sami jita-jitar cewa akwai takaddamar da ta taso tsakanin masunta a garin da mahukuntan karamar hukumar kan batun cinikin ruwan kogi kafin masuntan su yi sun kifi a kogin Nguru.

Jita-Jitar ta ce za a siyar wa masuntan ruwan kogin ne kan farashin kudi N500,000 kuma wai an saya N200,000 amma an ce da su albarka.

Jita-Jitar ta kuma alakatanta sayar da kogin da zargin cewa wai masuntan ba su zabi jam'iyyar APC ba a zabubnukan da suka gabata.

To ko ma dai yaya ne? wannan Dandali ya yi kokarin jin ta bakin shugaban karamar hukumar kan wannan jita-jitar to amma sai dai hakar Dandalin ba ta cimma ruwa ba.

Wasu masu fashin bakin siyasa a Nguru sun bayyana cewa wannan wata 'yar manuniya ce dake nuna cewa Dimukradiyyar garin ta fara girma.

Hon. Lawan Sani dai dan jam'iyyar adawa ce ta PDP dake wakiltar Nguru ta tsakiya a Majalisar jiha yayin da Hon. Ali Maidami kuma dan jam'iyyar APC mai mulki ne.

Gwamnan jihar Yobe Hon. Mai Mala Buni ya ayyana dokar ta-baci a fannin Ilmi a jihar

Gwamna Buni na jihar Yobe

Gwamnan jihar Yobe Hon. Mai Mala Buni ya sanar da sanya dokar ta-baci a fannin Ilmin Firamare da na Sakandare a fadin jihar.

Jaridar Daily Truth ta rawaito cewa gwamna Buni wanda aka rantsar a yau Laraba ya fadi hakan ne a jawabinsa na rantsuwar kama aiki da aka gudanar a dakin taro na Banquet a gidan gwamnati a garin Damaturu.

Mai Mala Buni ya ce matakin ya dauke shi ne domin bunkasa ginshikin da tsohon gwamna Ibrahim Gaidam ya assasa a sashen.

Jaridar ta ce gwamna Buni ya kuma yi alkawarin samar da cibiyar kula da lafiya daya a kowace unguwa cikin unguwanni 178 na jihar, tare da samar da Tiraktoci ga manoma a kananan hukumomin jihar 17 a farkon damuma.

Ta bangaren ababen more rayuwa kuma, jaridar ta rawaito cewa, gwamna Mai Mala Buni ya yi alkawarin kammala aikin hanyoyin da ya gada daga tsohuwar gwamnati, tare da gina karin wasu sabbi da suka kunshi hanyar Gujba— Ngalda, da Tikau—Jajere, da Dogon Kuka—Jajere da kuma hanyar Yusufari—Machina da dai sauransu.

Kazalika Mai Mala Buni ya fada cewa zai gina kasuwanni na zamani( Modern Markets) a manyan garuruwan jihar da suka hada da Potiskum da Damaturu da Gashu'a da Nguru da Gaidam da Buni-Yadi da kuma Ngalda, tare da gina tashar Tireloli a Potiskum da wasu garuruwa.

Ya kara da cewa gwamnatinsa za kuma ta farfado da masana'antun jihar da suka durkushe na tsawon shekaru domin bunkasar kudaden shiga na jihar.

Za mu kafa kungiyar yada Alheran Dr. Usman Al-amin– wasu matasa a Nguru

Usman Al-amin(PhD)

Wasu matasa a Nguru sun bayyana cewa suna nan suna shirin kafa wata kungiya da zata wayar wa jama'ar garin kai dangane da alherin Dr. Usman Al-amin idan ya zama Provost.

A zantawarsu da wannan Dandali a ranar Lahadi a Nguru, matasan suka ce za su bi lungu da sako-sako na garin da kewaye domin nuna nagartar Daktan idan aka ce ya zama Provost.

Wani matashi mai suna Umar da ya yi magana a madadin sauran, ya tabbatar da cewa shirye-shiryensu ya yi nisa domin ganin kungiyar ta tabbata.

Ya ce a kungiyance za su bi masu ruwa da tsaki a koina a fadin jihar domin neman goyon bayansu kan Al-amin Usman ya kasance shugaban Kwalejin Atiku Abubakar mai zuwa.

Yana mai cewa idan Daktan ya sami matsayin to babu ko shakka dalibai da iyalansu za su sami sa'ida.

A ' yan kwanakin nan jama'a da dama ne ke ta kiraye-kirayen Daktan da ya naimi shugabancin Kwalejin Atiku Abubakar dake Nguru, to sai dai har kawo yanzun hakar Dandalin ba ta cimma ruwa ba a kokarinsa na jin martanin Daktan kan wannan batu.

Dr. Usman Al-amin wanda a halin yanzu ke daf da kammala karatunsa na Digirin digirgir a Jami'ar birnin Hamburg na kasar Jamus, malami ne a sashen Tarihi a Jami'ar Maidugurin jihar Borno.

DALIBAN Dr. AL-AMIN SUN KOKA GAME DA YANKEWAR HOTUNANSA A KAFAR SADA ZUMUNTA

Dr. Usman Al-amin

Wasu tsoffin daliban Dr. Usman Al-amin da suka ce Daktan ya koyar da su, sun koka kan abin da suka kira daina ganin fatan alheri wa Daktan na 'yan kwanaki a kafafen sada zumunta.

A zantawarsu da wannan Dandali a ranar Alhamis a Nguru, daliban suka ce suna jin dadin yadda ake danganta Al-amin da shugabancin Kwalejin Atiku Abubakar dake Nguru.

Suka ce suna kuma jin dadin yadda suke ta ganin hotunan Daktan mabambanta a kafar suna yawo abin da a cewarsu yakan sa su su rika tuna alheransa da ya shuka musu.

Wani tsohon dalibinsa da ya ce sunansa Musa ya ce Dr. Usman Al-amin ya koyar masa kuma ya taimaka masa sosai a lokacin da yake koyo.

Dalibin ya ce yana jin dadin yadda ake danganta Al-amin da neman Provost domin a ganinsa Daktan zai taimaka wa dalibai matuka.

Shi ma wani tsohon dalibinsa a Kwalejin ta Atiku Abubakar wanda ya ce wanda ya ce a boye sunansa ya tabbatar wa wannan Dandali cewa, Dr. Al-amin mutumin kirki ne ba zai tsauwala wa dalibai da iyalansu ba matuka.

Ya ce tabbatas idan Dr. Al-amin ya sami Provost to fa kakar dalibai ta yanke saka kasancewarsa mai tausayi da ba sira da taimako.

A dan tsakanin nan ne dai aka sami bullar wasu sakonni a kafafen sada zumunta, musamman na Facebook wadanda a cikinsu ake yi fatan ya sami Provost, kafin a sami tsagaitawarsu a kafar cikin 'yan kwanakin nan.

Iyaye da 'yan uwa da aminan ne suka yi ta kiraye-kirayen, to sai dai har kawo yanzun hakar Dandalin ba ta cimma ruwa ba a kokarinsa na jin martanin Daktan kan wannan batu.

Dr. Usman Al-amin wanda a halin yanzu ke daf da kammala karatunsa na Digirin digirgir a Jami'ar birnin Hamburg na kasar Jamus, malami ne a sashen Tarihi a Jami'ar Maidugurin jihar Borno.

Da za a bukaci ji daga garemu to da mun goyi bayan Dr. Al-amin a Provost— Wasu daliban AACOLIS Nguru

Dr. Usman Al-amin

Wasu dalibai a Kwalejin Atiku Abubakar dake Nguru sun bayyana cewa za su goyi bayan Dr. Al'amin a neman shugabancin makarantarsu muddun aka saurari ra'ayinsu.

A zantawarsu da wannan Dandali a ranar Juma'a a garin Nguru, daliban suka ce a yanzu ba za su ce komai kan dalilansu na cewa za su iya goyon bayan Daktan duba da cewa su daliban Makarantar ne a halin yanzun.

Wani dalibi da ya ce a boye sunansa ya tabbatar wa wakilin  wannan Dandali cewa a yanzu dai ba zai kara cewa komai ba, kasancewar shi dalibi ne, to amma sai dai ya ce tun lokacin da ya lura ana neman Dr. Usman Al-amin da nemi shugabancin Kwalejin sai ya sa a ransa cewa an yi kyakkyawan zabi.

Dalibin ya kuma kirayi Daktan Al-amin da amsa kiran jama'a domin ya dora makarantarsu kan gwadabe nagari wanda basirarsa ta hango.

Ya ce Dr. Usman Al-amin ya karantarwa wata yayarsa inda yake jin yadda 'yar uwarsa take yaba Daktan kan kokarinsa na ganin ya ciyar da dalibai gaba.

Shi ma dai wani dalibin makarantar dake shekarar karshe da ya zanta da wannan Dandali ta kafar WhatsApp ya nuna fatan alherinsa ne ga Dr. Usman Al-amin a matsayin Provost.

Ya ce Dr. Usman Al-amin ya cancanta duk kuwa da ba zai iya yin karin haske a lokacin kan cancantar ba.

Dalibin ya kuma sake yin kira ga Dr. Al-amin Usman da ya amsa kiran jama'a, yana mai nusar da shi cewa ya kamata Daktan ya fifita son jama'a ba wai son kansa ba.

A 'yan makwannin nan dai kiraye-kiraye kan Daktan da ya amsa kiran jama'a kan batun shugabancin Kwalejin ya yawaita, to sai dai har kawo yanzun hakar Dandalin ba ta cimma ruwa ba a kokarinsa na jin martanin Daktan kan batun.

Dr. Usman Al-amin wanda a halin yanzu ke daf da kammala karatunsa na Digirin digirgir a Jami'ar birnin Hamburg na kasar Jamus, malami ne a sashen Tarihi a Jami'ar Maidugurin jihar Borno. 

DA DUMI-DUMI: Daliban Nguru a manyan makarantu za su gudanar da addu-o-in Dr. Al-amin sai ya yi Provost

Wasu dalibai 'yan asalin karamar hukumar Nguru dake a manyan makarantu sun bayyana cewa za su gudanar da jerin addu-o-i na musamman domin ganin Dr. Usman Al-amin ya yi Provost.

Daliban a zantawarsu da wannan Dandali a Jami'ar Bayero Kano, a ranar Lahadi suka ce suna jaddada goyon bayansu ga Dr. Usman Al-amin a Provost, tare da nuna shirinsu na gudanar da addu-o-i na musamman domin ganin cewa sai Daktan ya yi Provost.

Jama'a da dama ne dai ciki da wajen Nguru ke ta yin kiraye-kiraye ga Daktan da ya zo ya jagororanci Kwalejin Atiku Abubakar dake Nguru a fatansu na alheri da suke yi masa.

Idan za a iya tunawa ko a Asabar din da ta gabata ma sai da wasu mutane a Nguru suka yi irin wannan kiran, to amma har kawo yanzu ba mu iya jin martanin Daktan kan wannan batu ba.

Daktan Usman Al-amin dai Malami ne a tsangayar Tarihi a Jami'ar Maidugurin jihar Borno, wanda a halin yanzu ke daf da kammala karatunsa na Digirin digirgir a Jami'ar birnin Humbug na kasar Jamus.

An kirayi Dr. Al-amin da ya naimi Provost

Jama'a da dama ne a garin Nguru suka bukaci Dr. Usman Al'amin da ya mika kokon bararsa na naiman shugabancin Kwalejin Atiku Abubakar Nguru da aka fi sani da sunan Legal.

Wasu da suka zanta da wannan Dandali a Nguru sun nuna cewa suna yi wa Daktan fatan alheri a zama Provost.

Wani magidanci a Nguru ya ce ya san Dr. Al'amin jajirtacce ne tun a kuruciya.

Ya ce mutum ne mai kokarin gaske ta fuskar karatu da riko da addini da kuma martaba kowa.

"Lallai ya kamata a jaraba shi domin shi ma zai yi iya kokarinsa wajen habakar Makarantar" a cewarsa.

Ita ma dai wata mata da ta ce malamar Makaranta ce a zantawarta da wannan Dandali ta wayar salula a ranar Asabar ta fada cewa, da a ce za ta yi ido hudu da Dr. Usman Al'amin, to da sai ta ba  shi shawarar ya naimi Provost.

Dandalin ya yi kokarin jin martanin Daktan wanda a halin yanzu ke can a birnin Humbug na sakar Jamus inda yake karatunsa na Digirin digirgir a jami'ar birnin, to amma sai dai hakar Dandalin ba ta cimma ruwa ba.

Dr. Usman Al'amin dai Malami ne a tsangayar Tarihi a Jami'ar Maidugurin jihar Borno.