ZAN FARA RABA MUKU JARI DA ZARAR NA DAWO NGURU — HON. LAWAN SANI — MATA

Dan majalisa mai wakiltar Nguru ta tsakiya Hon. Lawan Sani ya tabbatar wa mata a mazabarsa cewa ya shirya tsaf domin fara raba musu jari kamar yadda ya alkawuranta musu a lokacin yakin neman zabe.

Hon. Lawan wanda ke a birnin Abuja a halin yanzu ya fada a zantawarsa da wannan Dandali ta wayar salula cewa zai fara ba wa matan jarin ne da ya dawo Nguru.

To sai dai Honarabil din ya kokwanta cewa balalle ne dukkannin alkawaran su samu ba, inda ya buga misali da wasu gaggan shugabanni da su ma ba su iya cika dukkan komai ba.

Ya ce Allah shi ke cika komai daidai, to amma ya ce zai yi iya kokarinsa wajen ganin Allah ya taimake shi ya cika su gaba daya.

Ko da wakilin Dandalin tambaye shi shin ko mai zai ce game da zargin da mutum 10 ya koma APC?  Nan take sai ya karyata zargin cikin raha, inda ya ce ko a ahalin gidansu ma wadanda ya koma da su sun fi mutane 10.

A doguwar hirarsa da wannan Dandali Hon. Lawan ya kuma yi kakkausan martani ga masu cewa sai da ya danke wasu 'yan sulalla kafin sauyin shekarsa, inda ya kalubalanci duk wani mai ikirarin hakan akan ya kawo hujja.

Yana mai tabbatar da cewa ya koma APC ne ba tare da ya gindaya ko an gindaya masa wani sharadi ba.

Wakilin wannan Dandali ya sake tambayar sa game da zargin rashin yin shawara da 'yan tsohuwar jam'iyyarsa gabanin sauyin shekarsa? Hon. Lawan sai ya kada baki ya ce, ko kadan bai yi gaban kansa ba har sai da ya naimi shawara.

Ya ce wadanda ya shawarta sun san ya yi Shawara, wadanda kuma neman bai kai gare su ba, ya ce to ka ga wadannan dole su ba a yi shawara ba kwata-kwata.

Hon. Lawan daga karshe ya gode wa masoyansa da ma daukacin al'umar Nguru, inda ya musu albishirin cewa akwai wani gagarumin gangami da za a shirya na neman gaisuwa.

Sannan kuma ya yi barazanar neman hakkinsa daga duk wanda ya yi masa yarfe ko kazafin bai ji ba bai gani ba.

DAN MAJALISA DAYA NA PDP A JIHAR YOBE YA KOMA JAM'IYYAR APC

Dan majalisar jiha na jam'iyyar PDP mai wakiltar Nguru ta tsakiya a jihar Yobe, Hon. Lawan Sani Inuwa, ya fice daga jam'iyyar inda ya koma jam'iyyar APC.

A Larabar nan ce dai labarin sauya shekar da hotunan dan majalisar ya game dandalin sada zumunta na galibin wadanda yake wakilta.

Batun sauya shekar Hon. Lawan Sani ya janyo cecekuce a Nguru, inda wasu ke ganin cewa sauyin shekar babu abin da za ta janyo wa dan majalisar face nadama, yayin da wasu ke ganin sauyin shekar shi ya dace.

Wani dan jam'iyyar PDP mai goyon bayan dan majalisar da ya bukaci a boye sunansa ya shaida wa wannan dandali cewa Hon. Lawan bai yi aiki da shawara ba a yayin sauyin shekarsa.

To sai dai a zantawarsa da wannan dandali a daren Larabar nan Hon. Lawan ya kwatanta sauya shekarsa da sinadarin gaskata mafarkin wadanda ake wakilta.

Hon. Lawan ya kara da cewa duk fadi-tashinsa a tsohuwar jam'iyyarsa da kuma sabuwa da ya koma shi ne domin ya ga ya cimma muradun al'umarsa gaba daya kwata.

Ya ci gaba da cewa bai fice daga jam'iyyar PDP ba zuwa APC, har sai da ya nemi shawarwari daga masana kan alheri yin hakan ko akasin haka ga mutanensa.

Ana sa ran daga gobe Alhamis ne zuwa wani lokaci za a gudanar da gangamin wankar dan majalisar a Nguru.

Da ma dai Hon. Lawan dan jam'iyyar APC ne Kafin daga bisani ya koma PDP.

Abin jira a gani dai a halin yanzu shi ne martanin jam'iyyar PDP kan sauyin shekar, tare sauraran ganin shin ko Honarabil din ya koma APC ne tare da Jama'arsa ko kuma dai shi kadai ya koma?

Malaman Sakandare a Yobe sun shiga aji a karan farko bayan sake bude makarantu

Mafi yawancin daliban ajin karshe na makarantun karama da babbar Sakandare a jihar Yobe a yau Talata sun koma makarantunsu, inda a wasu makarantun har aka fara gabatar musu da darussa.

A Larabar da ta gabata ne gwamnatin jihar Yobe ta ba da izinin sake bude makarantun Sakandare domin daliban ajin kashe su dauki jarabawar karshe ta WASSCE.

Wakilin wannan Dandali a yau Talata ya kewaya wasu makarantu a Nguru, ya kuma ba da labarin cewa dalibai da dama sun koma, inda har a wasu makarantu aka gudanar da darussa.

A makarantar gwamnati ta Haya Islam inda wannan Dandali ya fara ziyarta, an martaba ka'idojin matakan kariya  da gwamnatin tarayya ta dingaya.

Wani Malamin makarantar da ya bukaci a boye sunansa a zantawarsa da wannan Dandali ya nuna jin daɗinsa da bude makarantun.

Yana mai korafin cewa tsarin da a ka yi na bitar karatuttukan yaran a cunkushe yake.

A sauran makarantu ma a garin, wasu rahotanni sun nuna cewa lamarin bai sauya ba, yayin da a wasu kuma aka samu tsaiko kafin a gama gwajin zafin jikin dalibai.

A tuna cewa, a Litinin din mako mai zuwa 17 ga watan Agusta 2020 ne daliban makarantun Sakandare a fadin kasa za su fara daukar jarabawar karshe ta WASSEC da hukumar shirya jarabawar Afirka ta Yamma WAEC ke shiryawa.

Makarantu sun koma a jihar Yobe, malamai na ci gaba da tsara jadawalin duba masu daukar jarabawa

Malamai da daliban aji 3 na babbar Sakandaren kwana a jihar Yobe sun koma makarantunsu a yau Asabar.

Wannan na zuwa ne bayan gwamnatin jihar ta umarci makarantun Sakandare a jihar da su koma a ranakun 8 da kuma 11 ga watan Agusta 2020 domin tunkarar jarabawar WAEC ga daliban azuzuwan karshe.

A karamar hukumar Nguru a mafiya yawan makarantun daliban ba su koma ba tukunna.

Duk kuwa da cewa sanarwar da ma'aikatar ilimin jihar ta fitar a ranar Laraba ta nuna cewa makarantu masu zaman kansu za su koma ne a ranar Talatar 11 ga watan Agusta.

To sai dai an sami wasu makarantun Sakandare masu zaman kansu na Islamiyoyi a garin da suka koma tun a yau Asabar.

Wakilin wannan Dandali a yau Asabar ya ziyarci Makarantar Higher Islam ya kuma ba da labarin cewa dalibai kadan ne suka koma a yau Asabar, galibin wadanda suka koma su ne ma'aikata.

Malam Dahiru Usman Alfullaty, daya ne daga cikin Malaman da suka koma a yau Asabar, a zantawarsa da wannan Dandali ya bayyana cewa akwai tsirarun daliban da suka koma, amma galibinsu suna cikin kayan gida.

Ya kara da cewa a halin yanzu malamai sun dukufa wajen tsara jadawalin ajin karatu na musamman ga daliban da na masu dubu su a yayin da suke daukar jarabawarsu ta karshe da za fara mako mai zuwa.

Idan ba a manta ba Gwamnatin tarayya a kwanannan ta umarci daliban aji 3 na makarantun Sakandare a fadin kasa da su koma makarantunsu a ranar 4 ga watan Agusta, bayan sun shafe watanni 5 a gida, inda a jihar Yobe sai a Asabar din nan ce a ka bude makarantun.

Ma’aikatar Lafiya ta jihar Yobe ta ba da gudumowar kayan kariya ga ma’aikatar ilimin jihar a gabanin sake bude makarantu

Kasa da awoyi 24 da a bude makarantu a jihar Yobe, Ma'aikatar ilimi Firamare da na Sakandare ta jihar ta karbi gudumowar kayan kariya daga annobar Corona daga ma'aikatar lafiya ta jihar.

Kayan kamar yadda ma'aikatar ilimin ta wallafa a shafinta na Facebook cikin wani jawabi a ranar Alhamis, za a yi amfani da su ne a makarantun da a ka bude.

Ma'aikatar ta ce ta karbi kimanin abubuwan wake hannu guda 100 da a ke sarrafasu da kafa, da mayukan tsaftace hannu na hand sanitizers.

Jawabin ya ambato cewa Sakataren dindindin na ma'aikatar lafiya ta jihar Alhaji Mahidu M. Alhaji tare  da Sakataren hukumar lafiya a matakin farko Dr. Babagana Kundi Machina ne suka mika kayan ga Kwamishinan Ma'aikatar ilimin Firamare da Sakataren jihar Dr. Muhammad Sani Idris tare da Sakataren dindindin na ma'aikatar Alhaji Yakubu Dokshi da sauran manyan jami'an ma'aikatar.

Yobe za ta bude makarantu a ranar Asabar

Gwamnatin jihar Yobe ta sanar cewa za ta bude makarantu a ranar Asabar 8 ga watan Agusta.

Wannan na kunshe ne cikin wata sanarwa da Ma’aikatar Ilimin Firamare da Sakandaren jihar ta wallafa a shafinta na Facebook a ranar Laraba.

Sanarwar ta bayyana cewa daliban aji 3 na babbar Sakatare da daliban karamar Sakatare na makarantun kwana za su koma a ranar Asabar din 8 ga watan Agusta, yayin da daliban makarantu masu zaman kansu kuma za su koma a ranar Talatar 11 ga watan Agusta 2020.

Ma'aikatar a jawabin ta kuma shawarci daliban da su sanya takunkumin fuska. Tana mai shawartar hukumomin makarantun da su samar da matakan kariya game da annobar Covid-19

Kwamishinan ma'aikatar Dr. Muhammad Sani Idris ya bayyana cewa gwamnatin jihar karkashin jagorancin gwamna Mai Mala Buni ta tabbatar da cewa a ko da yaushe za ta bi umarnin daukan matakan kariya da gwamnatin tarayya ta gindaya.

Har wa yau kwamishinan ya bukaci daliban aji 3 na babbar Sakataren da su kintsa tsaf domin tunkarar jarabawar WAEC da za a fara a ranar 17 ga watan Agusta 2020 domin samun kyakkyawan sakamako ta yadda jihar za ta yi alfahari

Kwamitin shari'a a Nguru zai tattauna kan sha'anin aure a ranar Lahadi

Kwamitin shari'ar addinin Muslunci a Nguru (Nguru Shari'a Implementation Committee) zai tattauna kan al'amuran auratayya wacce ake gani ta tabarbare a tsakanin al'uma.

Wani mamban kwamitin Malam Muhammad Sani Alhasan ya rubuta a shafinsa na Facebook a ranar Asabar cewa, ganarwar za a gudanar da ita ne a yau Lahadi a masallacin Juma'a na kofar fada da misalin karfe 10 na safe, inda za a tattauna batun manyan matsaloli 2 da suka yi wa aure dabaibayi tare da lalubo hanyoyin magance su.

Malam Alhasan ya ce 'yan kwamitin za su tattauna batun matsalolin aure da kuma tsirface-tsirfacen da a cewarsa su suke janyo tsadar aure.

Wasu da dama dai na ra'ayin cewa rashin fahimtar hakikanin aure kafin yin sa, da kwadayi da babban buri, tare kirkirarrun al'adun aure na taka muhimmiyar rawa wajen karuwar mace-macen aure da raguwar yinsa a tsakanin matasa.

Tsohuwa mai shekara 107 ta warke daga corona a kasa mai tsarki

Wata tsohuwa 'yar shekara 107 a kasa mai tsarki ta warke a asibitin Jeddah bayan ta kamu da cutar Corona.

Sashin Hausa na BBC ya rawaito cewa babban darakta a asibitin Jeddah, Dokta Khaled Al-Ghamdi ya ce tsohuwar ta yi ta fama da matsalar numfashi, inda a ka garzaya da ita zuwa sashen samun kulawar gaggawa inda tawagar manyan likitoci karkashin jagorancin Dokta Ruba Hindi suka sa ido har warkewarta.

BBC ta ce tsohuwar ta nuna alamomin cutar da suka kai ga ta kamu da pneumonia da karancin numfashi, hakan ya tilasta aka sa mata na'urar da ke taimaka wa numfashi har na tsawon kwana hudu.

Yanzu haka an sallame ta bayan an tabbatar da cewa ta samu cikakkiyar lafiya.

Hukumomin asibitin sun ce yanzu haka ta murmure kuma babu wani ciwo da ke tattare da ita.

An kaddamar da kungiyar masu aikin Satellite yau a garin Nguru

An kaddamar da kungiyar masu aikin tauraron dan Adam (Satellite) ta Nguru Satellite Installers' Technician cooperative society Ltd yau Laraba a garin Nguru.

An yi bikin kaddamar ne cikin wani yanayi na taka-tsantsan inda aka takaita taruwar da wasu mutane a yayin kaddamarwar.

Tun gabanin fara bikin kaddamarwar, sai da mahalarta bikin suka wanke hannayensu da man sanitizer.

Shugaban kungiyar Malam Yahaya mai nasara tare da sauran shugabannin kungiyar ta bakin jami'in hudda da jama'a na kungiyar Muhammad Jamilu sun bayyana jin dadinsu tare da godiya ga Allah da ya tabbatar da kafuwar kungiyar.

Ya zuwa yanzu dai wannan kungiya ita ce irin ta ta farko da a ka assasa a fadin jihar Yobe baki daya.