Tuesday, August 21, 2018

Wajibin iyaye ne da su isar da amanar 'ya'yan da Allah ya ba su— Hudubar Idin babbar Sallah

An yi kira ga iyaye da su zama masu kishin iyalansu wajen kula da tarbiyyarsu domin samun tsira da samun al'uma tagari da kuma tsira a gidan duniya da na lahira.

A wani sako da kwamitin shari'a a Nguru ya aika wanda Limamin masallacin Idi na Kwalejin Atiku Abubakar da ke Nguru Al- Sheikh Umar Jinjiri da a ka fi sani da Iya da baba ya karanta yayin hudubarsa ta Sallar Idin babbar Sallah yau a garin Nguru.

Malamin ya ce wajibi ne ga iyaye da su tsare amanar da Allah ya ba su ta 'ya'ya domin samun tsira gidan duniya da lahira.

A sakon kazalika Al- sheikh Iya da baba ya bayyana cewa koke-koken da ke ta karuwa a tsanin al'umomi na bacin tarbiyya sun hada da yawaitar zinace-zinace da shaye-shaye da kuma neman maza.

Malamin ya ci gaba da cewa ba dalili ba ne al'umomi su zuba idanu ana aikata fasadi domin wai ana takamar 'yanci.

Yana mai tsawatar wa iyayen game da fadin manzon Allah na  wajibcin kawar da fasadi akan al'umomi domin gudun halaka ta gaba daya.

Friday, June 15, 2018

Kokarin nemo aibin Musulmi da yayata shi ba ya daga koyarwar Muslumci — Hudubar Juma'a

An yi kira ga al'umar Musulmai da su zama masu rufe asirin 'yan uwansu domin ribatar rayuwar duniya da ta lahira.  

Babban limamin masallacin Juma'a na Kwalejin Atiku Abubakar da ke Nguru Al-sheikh Umar Jinjiri wanda aka fi sani da Iya da Baba, shi ne ya yi wannan kiran a hudubarsa ta Sallar Juma'a yau a garin Nguru.

Sheikh Iya da Baba ya ce akwai bukatar Musulmai da su rungumi al'adar nan ta sakaye sirrin junansu musamman ma ga abubuwan da ka iya ragewa juna kima.

Malamin a hudubar tasa ya kuma gargadi Musulman da su nisantar da kansu kacokan wajen binciko sirrin dan uwansu da Allah ya rufe tare da kokarin yayata shi.

Yana mai cewa yin hakan ita ce karantarwar addinin ga Musulmai.

Malamin daga karshe ya rufe da Hadisin Manzon Allah ( SAW), inda ya bukaci manya daga cikin Musulmai su tausawa kananansu, yayin da kananan su kuma su girmama wadanda suka fisu yawan shekaru.

Sunday, March 11, 2018

Ya kamata a katange Makarantar Higher Islam da ke Nguru ko don saboda tsaro — I. A Nguru

An yi kira ga Gwamnan jihar Yobe Alh. Ibrahim Gaidam da ya hanzarta waiwayar Makarantar Higher Islam da ke Nguru a aikin da ya somo na kwaskware makarantun sakandaren kwana na jihar. 

Wani uba a Nguru Malam Ibrahim Alaramma shi ya yi wannan kiran yayin zantawarsa da wannan Dandali ranar Lahadi a Nguru.

Wannan kiran na zuwa ne makonni kadan da sace 'yan mata 110 daga makarantar sakandaren 'yan mata ta garin Dapchi a jihar da ake zargin Boko Haram da aikatawa.

Alaramma ya ce yana mamakin yadda mai girma Gwamna ya yi kamar ya manta da makarantar, wacce ta yaye manyan mutane masu yawa da suka fantsama ciki da wajen kasa.

Ya kara da cewa a halin yanzu haka ba ya tsammanin akwai Makarantar sakandaren da ta kai ta yawan dalibai a fadin jihar naki daya.

A cewarsa to amma sai dai an bar makarantar a yashe.

Ya ci gaba da cewa, al'amarin da gaske yana ba shi mamaki a yadda ya san Gwamnan wajen kokarinsa na farfado da harkar ilimi, amma kuma ko ta yaya aka bar daruruwan dalibai a filin Allah? Filin da a cewarsa babu ko danga ballantana katanga.

A don haka sai ya bukaci Gwamna Gaidam da yi duk mai yiwuwa wajen ganin an katange Higher Islam din, tare da gina mata sabbin azuzuwa da dakunan kwanan dalibai da na malamai cikin lokacin da ba mai nisa ba.

Yana mai siffanta yin hakan a matsayin wani babban kandagarki da zai taimaka wajen kare makarantun sakandaren jihar daga farmakin 'yan ta'adda.